O‘zbekiston Respublikasi Prezidenti saylovini o‘tkazuvchi 6-Namangan okrug saylov komissiyasining yig‘ilishi bo‘lib o‘tdi. Bu haqda O‘zA xabar bermoqda.
Okrug saylov komissiyasi tomonidan tuman va shaharlar hokimliklari hamda harbiy qismlar komandirlarining saylov uchastkalarini tuzish to‘g‘risidagi taqdimnomalari asosida okrug hududida 690 saylov uchastkasi tuzildi. Saylov uchastkalarining tartib raqami, chegarasi va manzili ko‘rsatilgan ro‘yxati tasdiqlandi. Okrug saylov komissiyasining bu haqdagi tegishli qarori qabul qilindi.
— Saylov uchastkalarini tuzishda, avvalo, muayyan hududda istiqomat qiluvchi saylovchilarga qulay va zamonaviy binolar tanlandi, — deydi 6-Namangan okrug saylov komissiyasi raisi Paxriddin Matkarimov. — Saylovda 1 million 771 mingdan ziyod saylovchi ishtirok etishi kutilmoqda. Ularning 69 ming 185 nafari birinchi marotaba ovoz beradigan yoshlardir.
Yig‘ilishda uchastka saylov komissiyalarini tuzish, saylov uchastkalarini davlat ramzlari, mebel jihozlari, aloqa, axborot, texnika vositalari bilan ta’minlash borasidagi vazifalar muhokama etildi.
Izoh (0)