AQSh ma’muriyati fuqarolariga “Mettyu” dovuli yaqinlashayotgani sababli Gaitini tark etishni tavsiya qiladi. Bu haqda Davlat departamentining 2-oktabr, yakshanba kuni tarqatilgan ogohlantiruvida ma’lum qilingan, deya xabar beradi “TASS”.
“Davlat departamenti AQSh fuqarolarini ‘Mettyu’ dovuli yaqinlashayotgani haqida ogohlantiradi va Gaitiga safarlarini qoldirishni maslahat beradi. Biz amerikaliklarga imkon boricha Gaitini tark etish va dovul yaqinlashgunga qadar aviatashuvchilar xizmatidan foydalanishga chaqiramiz: ob-havo sharoitlari yomonlashgandan keyin aeroportlar yopiladi”, — deyiladi bayonotda.
AQSh dovullarni kuzatish milliy markaziga ko‘ra, “Mettyu” Gaitiga 36 soat davomida yetib boradi.
Davlat departamenti оldinroq Yamayka va Bagama orollari borasida ham shunday ogohlantiruvlarni bildirgandi.
Izoh (0)