Яқинда «Ижтимоий фикр» жамоатчилик фикрини ўрганиш марказининг «Оила ва маънавият» мавзуида ўтказган ижтимоий тадқиқоти якунига етди. Тадқиқотдан мақсад мамлакатдаги оилаларнинг барқарор маънавий-ахлоқий қадриятларини, унинг жамиятдаги анъанавий ижтимоий тузилма сифатидаги ривожланиш омилларини аниқлаш эди, деб хабар беради ЎзА.
Айтилишича, тадқиқотда қатнашганларнинг 94,5 фоизи давлат оилаларни қўллаб-қувватлашга катта эътибор кўрсатаётганини эътироф этган.
Тадқиқот жараёнида Ўзбекистон оилаларида ахлоқ шаклланишига энг кўп таъсир қилиши мумкин бўлган омиллар ҳам ўрганилган. Ўзбекистон оилаларининг маънавий-ахлоқий асосларини шакллантиришда оила (86,7 фоиз), маҳалла (52,1 фоиз), таълим муассасалари (48,2 фоиз), ижтимоий муҳит (33,9 фоиз) ва телевидениенинг (29,4 фоиз) устувор таъсири ҳақидаги фикр бир неча йиллик сўровлар мобайнида барқарор қолмоқда.
Тадқиқот натижалари оила қуришда ахлоқий йўналишлар барқарор эканини кўрсатди. Масалан, мустақил ва бахтли оила барпо этиш шартларининг кўрсаткичлари ўзгаришсиз қолмоқда. Улар орасида эр-хотиннинг ўзаро ишончи, бир-биридан розилик биринчи ўринни эгаллайди. Иштирокчиларнинг фикрича, эр-хотиннинг ўзаро муҳаббати, фарзандлар оила барқарорлиги ва мустақиллигини белгиловчи муҳим омилдир.
Сўровнинг кўрсатишича, аҳолининг мутлақ кўпчилиги (96 фоиз) ўз оиласини мустаҳкам ва бахтли деб ҳисоблайди.
Шунингдек, тадқиқот аксарият оилаларда болаларни юксак маънавий-ахлоқий қоидалар руҳида тарбиялашга катта эътибор берилаётганини кўрсатди.
Ижтимоий сўров ёшлар ўртасида олий маълумот олишга интилиш ўсиб бораётганини яна бир бор исботлади. Тадқиқот фуқароларнинг аксарияти фарзандлари замонавий шахслар бўлиб камолга етаётганига қатъий ишонишини кўрсатди.
Кўпчилик оилалар болаларини жисмоний тарбиялашга катта эътибор беради. Бу ёшларда жисмоний тарбия ва спортга барқарор қизиқиш ҳамда эҳтиёжни шакллантирмоқда. Иштирокчилар давлатнинг болалар спортини ва соғлом турмуш тарзини ривожлантириш стратегиясини фаол маъқуллаган. Уларнинг фикрича, бу «Соғлом она ва бола йили» Давлат дастурида ёрқин намоён бўлмоқда.
Сўров иштирокчиларининг мутлақ кўпчилиги (96,7 фоиз) оилавий ажримларга салбий муносабат билдирган. Уларнинг фикрича, бу болаларнинг таълим-тарбияси ва келажагига салбий таъсир кўрсатади.
«Оила ва маънавият» мавзуида ўтказилган ижтимоий тадқиқот Ўзбекистон аҳолиси учун оила асосий ҳаётий қадрият ва ёш авлодни тарбиялашнинг муҳим омили бўлиб қолаётганини кўрсатди, деб якун ясалади материалга.
Изоҳ (0)