Shimoliy Koreyaning sharqiy qirg‘og‘ida joylashgan Vonsan shahri 24-sentabr kuni boshlanadigan va ko‘plab tomoshabinlar kelishi kutilayotgan mamlakat tarixidagi ilk aviashouga tayyorgarlik ko‘rmoqda. Bu haqda “TASS” xabar berdi.
Mahalliy rasmiylar va sayyohlik kompaniyalari aviashouni keng ko‘lamda o‘tkazishni mo‘ljallamoqda. Rasmiy ochilish marosimidan so‘ng Air Koryo aviakompaniyasi fuqarolik samolyotlarining ko‘rgazmali parvozlari bo‘lib o‘tadi.
Shundan so‘ng Koreya xalq armiyasi uchuvchilari “MiG” va “Su” qiruvchi samolyotlarida o‘z mahoratlarini namoyish etadi. Shu kunning o‘zida KXDR Qizil Xoch jamiyati tomonidan tashkillangan xayriya lotereyasi o‘ynaladi.
25-sentabr, yakshanba kuniga Pxenyan aviatsiya klubi parashyutchilarining chiqishlari, aviamodellashtirish bo‘yicha musobaqalar rejalashtirilgan. Tomoshabinlar Air Koryo samolyotlarida yarim soat davomida uchishi, eng dovyuraklari esa yo‘riqchi hamrohligida parashyutdan sakrashi mumkin.
Aviashouda badiiy jamoalar konsertlari va sport bellashuvlari namoyish etiladi. Tashkilotchilar tomonidan pivo festivali va Yapon dengizi sohilida mahobatli mushakbozlik uyushtirilishi ham va’da qilingan.
Tadbirning asosiy qismi Vonsanda 2015-yilda qurib bitkazilgan Galma aeroporti hududi va shaharning markaziy maydonida bo‘lib o‘tishi bildirilgan.
Izoh (0)