Шимолий Кореянинг шарқий қирғоғида жойлашган Вонсан шаҳри 24 сентябрь куни бошланадиган ва кўплаб томошабинлар келиши кутилаётган мамлакат тарихидаги илк авиашоуга тайёргарлик кўрмоқда. Бу ҳақда «ТАСС» хабар берди.
Маҳаллий расмийлар ва сайёҳлик компаниялари авиашоуни кенг кўламда ўтказишни мўлжалламоқда. Расмий очилиш маросимидан сўнг Air Koryo авиакомпанияси фуқаролик самолётларининг кўргазмали парвозлари бўлиб ўтади.
Шундан сўнг Корея халқ армияси учувчилари «МиГ» ва «Су» қирувчи самолётларида ўз маҳоратларини намойиш этади. Шу куннинг ўзида КХДР Қизил Хоч жамияти томонидан ташкилланган хайрия лотереяси ўйналади.
25 сентябрь, якшанба кунига Пхеньян авиация клуби парашютчиларининг чиқишлари, авиамоделлаштириш бўйича мусобақалар режалаштирилган. Томошабинлар Air Koryo самолётларида ярим соат давомида учиши, энг довюраклари эса йўриқчи ҳамроҳлигида парашютдан сакраши мумкин.
Авиашоуда бадиий жамоалар концертлари ва спорт беллашувлари намойиш этилади. Ташкилотчилар томонидан пиво фестивали ва Япон денгизи соҳилида маҳобатли мушакбозлик уюштирилиши ҳам ваъда қилинган.
Тадбирнинг асосий қисми Вонсанда 2015 йилда қуриб битказилган Галма аэропорти ҳудуди ва шаҳарнинг марказий майдонида бўлиб ўтиши билдирилган.
Изоҳ (0)