Indoneziyadagi toshqinlar natijasida kamida 27 kishi halok bo‘ldi

Indoneziyaning Yava oroli g‘arbiy qismini qamrab olgan kuchli suv toshqini natijasida kamida 27 kishi halok bo‘ldi, yana 22 kishi bedarak yo‘qolgan, deb hisoblanmoqda. Bu haqda mamlakat Milliy qidiruv va qutqaruv agentligiga tayanib, “TASS” xabar berdi.

Bundan tashqari, G‘arbiy Yava provinsiyasi Garut okrugida 400 dan ziyod kishi o‘z uylarini tark etishga majbur bo‘lgan. Ayni paytda ular maxsus evakuatsiya markaziga joylashtirilgan. Eng ko‘p zarar ko‘rgan tumanlarga qutqaruvchilar brigadalari, harbiy xizmatchilar, politsiya bo‘linmalari, shuningdek, ko‘ngillilar yuborilgan.

Hukumat jabrlanganlarga moliyaviy ko‘mak ajratdi, shuningdek, oziq-ovqatlar, dori-darmonlar, suv, eng zarur mahsulotlarni yo‘naltirdi.