Saudi Arabian Airlines uchuvchisi laynerning olib qochilishi haqida yanglishib xabar bergani ma’lum bo‘ldi

Saudi Arabian Airlines uchuvchisi Filippin poytaxti Manila aeroportiga qo‘nayotganda adashib ikki marta laynerning olib qochilishini anglatuvchi maxsus tugmani bosgan. Bu haqda aeroport direktori Edmund Monreal ma’lum qildi, deya xabar beradi “TASS”.

“Maxsus tugmaning bexosdan bosib yuborilishi yuz bergan, ustiga-ustak, bu holat ikki bor takrorlangan. Saudiya Arabistonining Jidda shahridan Manilaga reysni amalga oshirayotgan havo kemasidan xavf signalini olgach, dispetcherlar samolyotni yakkalab qo‘ydi. Layner aeroportga qo‘nganidan so‘ng ekipaj adashgani haqida ma’lum qildi”, — deya ta’kidladi Monreal.

Hozirda hodisa yuzasidan tekshiruv ishlari boshlangan. Uning natijalari bo‘yicha uchuvchilar aybi qay darajada ekaniga aniqlik kiritiladi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.