BMT Bosh Assambleyasi 2-sentabr kuni 78 yoshida vafot etgan O‘zbekiston Birinchi Prezidenti Islom Karimov xotirasiga hurmat bajo keltirdi, deya xabar bermoqda “TASS”. Majlis bir daqiqalik sukut bilan boshlandi, shundan so‘ng 71-sessiya raisi Piter Tomson, shuningdek, tashkilot bosh kotibi Pan Gi Mun va boshqa qator mamlakatlar vakillari chiqish qildi.
BMT bosh kotibi ta’kidlashicha, Islom Karimovning eng muhim yutuqlaridan biri 2009-yilda Markaziy Osiyoda yadro qurolidan xoli bo‘lgan hududni yaratishga qo‘shgan hissasi bo‘ldi. Pan Gi Mun O‘zbekistonga ikki marta rasmiy tashrif bilan borgani va “mamlakat xalqining samimiyligini his etganini” eslatdi.
“Bugun, O‘zbekiston mustaqillikka erishganidan 25 yil o‘tgach, bir paytlar Prezident Karimov aytganidek, xalq manfaati, huquq va erkinliklari mamlakatni rivojlantirish bo‘yicha kuch-harakatlar yuqorisida turishi kerak”, — dedi u.
Uning so‘zlariga ko‘ra, BMT O‘zbekistonga “chuqur islohotlar o‘tkazishda, demokratiya institutlarini barpo etishda hamda inklyuzivlik va muzokaralar muhitini qo‘llab-quvvatlashda” yordam berish uchun qat’iylikka to‘la.
Diplomatlar o‘z nutqlarida Islom Karimovning yadrodan xoli hududni yaratishdagi, shuningdek mintaqada barqarorlikni ta’minlashdagi hissasini qayd etdi. Qozog‘istonning BMTdagi doimiy vakili Kayrat Abdurahmonov ta’kidlaganidek, O‘zbekiston Prezidenti prinsipli va halol yetakchi edi, shuningdek, xalqaro hamjamiyat bilan hamkorlik yo‘nalishi tarafdori edi.
O‘z navbatida, Sharqiy Yevropa davlatlari guruhi nomidan so‘zga chiqqan Estoniya vakili O‘zbekiston Karimov rahbarligi ostida Markaziy Osiyoda barqarorlikka va xalqaro aloqalar rivojlanishiga imkoniyat yaratgan siyosatni olib borganini aytdi.
O‘zbekistonning doimiy vakili Muzaffar Madrahimov majlis ishtirokchilariga o‘z hamyurtlari uchun bunday og‘ir daqiqalarda hamdardlik va ko‘mak so‘zlari uchun minnatdorlik bildirdi. U O‘zbekiston xalqi og‘ir va o‘rnini qoplab bo‘lmaydigan talafotni boshdan kechirganini aytdi.
Izoh (0)