Shveysariya bosh prokuraturasi germaniyalik afsonaviy futbolchi Frans Bekkenbauerga qarshi aksilkorrupsion tergov boshladi. Bu haqda, Der Spiegel nashriga asoslanib, “TASS” xabar bermoqda.
Idoraning ma’lum qilishicha, Bekkenbauer Jahon Chempionatini Germaniyada o‘tkazish talabnomasini FIFAga taqdim etishi lozim bo‘lgan “Germaniya–2006” qo‘mitasi rahbari bo‘lganida pul yuvishda va noqonuniy yo‘llar bilan boylik orttirishda gumon qilinmoqda.
Ilgariroq 2002-yilda Adidas rahbari bo‘lgan Rober Lui-Dreyfus “Germaniya–2006” hisobiga 10,3 million Shveysariya franki (6,7 million yevro) o‘tkazib bergani ma’lum bo‘lgan edi. Bu mablag‘lar qo‘mita ehtiyojlariga sarflanishi lozim edi, ammo ular hisobotlarda va soliq deklaratsiyalarida aks etmadi. Bu pullardan pora sifatida ovozlarni sotib olishda foydalanilgani taxmin qilinmoqda.
“Germaniya–2006” qo‘mitasini Bekkenbauer bilan birgalikda boshqargan, Germaniya futbol ittifoqining sobiq prezidenti Volfgang Nirsbax bir yil muddatga futbol faoliyatidan chetlashtirildi. Endilikda Bekkenbauer masalasi ko‘rib chiqilmoqda.
Izoh (0)