Швейцария бош прокуратураси германиялик афсонавий футболчи Франс Беккенбауэрга қарши аксилкоррупцион тергов бошлади. Бу ҳақда, Der Spiegel нашрига асосланиб, «ТАСС» хабар бермоқда.
Идоранинг маълум қилишича, Беккенбауэр Жаҳон Чемпионатини Германияда ўтказиш талабномасини ФИФАга тақдим этиши лозим бўлган «Германия–2006» қўмитаси раҳбари бўлганида пул ювишда ва ноқонуний йўллар билан бойлик орттиришда гумон қилинмоқда.
Илгарироқ 2002 йилда Adidas раҳбари бўлган Робер Луи-Дрейфус «Германия–2006» ҳисобига 10,3 миллион Швейцария франки (6,7 миллион евро) ўтказиб бергани маълум бўлган эди. Бу маблағлар қўмита эҳтиёжларига сарфланиши лозим эди, аммо улар ҳисоботларда ва солиқ декларацияларида акс этмади. Бу пуллардан пора сифатида овозларни сотиб олишда фойдаланилгани тахмин қилинмоқда.
«Германия–2006» қўмитасини Беккенбауэр билан биргаликда бошқарган, Германия футбол иттифоқининг собиқ президенти Вольфганг Нирсбах бир йил муддатга футбол фаолиятидан четлаштирилди. Эндиликда Беккенбауэр масаласи кўриб чиқилмоқда.
Изоҳ (0)