Qirg‘iziston tashqi ishlar vaziri Erlan Abdildayev Xitoyning Bishkekdagi elchixonasi binosiga hujum uyushtirgan terrorchining xatti-harakatlarini qoraladi. Bu haqda u Xitoy tashqi ishlar vaziri Van I bilan telefon suhbati chog‘ida aytib o‘tdi, deb yozadi “TASS”.
Abdildayev tegishli xizmatlar voqeaga zudlik bilan reaksiya ko‘rsatgani va barcha zarur choralarni amalga oshirganini ma’lum qildi, u elchixona hududidagi terrorchilik harakatini qat’iy qoraladi.
Qirg‘iziston tashqi ishlar vaziri, shuningdek, mamlakat prezidenti Almazbek Atambayev respublikaning tegishli organlariga “puxta tekshiruv olib borishni” topshirganini ta’kidladi. Vazir Xitoy tomoni tekshiruv ishlarining borishidan xabardor qilinishi va barcha aybdor shaxslar albatta topilib, tegishli jazoga tortilishini aytdi.
Xudkush terrorchi portlovchi modda bilan to‘ldirilgan mashinada Xitoy elchixonasi darvozasini buzib kirdi va diplomatik vakolatxona hududida portlashni amalga oshirdi. Xitoylik diplomatlardan hech kim jabrlanmadi. Portlash chog‘ida terrorchi halok bo‘ldi, ikki nafar Qirg‘iziston fuqarosi yaralandi.
Izoh (0)