Қирғизистон ташқи ишлар вазири Эрлан Абдилдаев Хитойнинг Бишкекдаги элчихонаси биносига ҳужум уюштирган террорчининг хатти-ҳаракатларини қоралади. Бу ҳақда у Хитой ташқи ишлар вазири Ван И билан телефон суҳбати чоғида айтиб ўтди, деб ёзади «ТАСС».
Абдилдаев тегишли хизматлар воқеага зудлик билан реакция кўрсатгани ва барча зарур чораларни амалга оширганини маълум қилди, у элчихона ҳудудидаги террорчилик ҳаракатини қатъий қоралади.
Қирғизистон ташқи ишлар вазири, шунингдек, мамлакат президенти Алмазбек Атамбаев республиканинг тегишли органларига «пухта текширув олиб боришни» топширганини таъкидлади. Вазир Хитой томони текширув ишларининг боришидан хабардор қилиниши ва барча айбдор шахслар албатта топилиб, тегишли жазога тортилишини айтди.
Худкуш террорчи портловчи модда билан тўлдирилган машинада Хитой элчихонаси дарвозасини бузиб кирди ва дипломатик ваколатхона ҳудудида портлашни амалга оширди. Хитойлик дипломатлардан ҳеч ким жабрланмади. Портлаш чоғида террорчи ҳалок бўлди, икки нафар Қирғизистон фуқароси яраланди.
Изоҳ (0)