Tramp Klintonni tibbiy kartasini ommaga oshkor qilishga chaqirdi

Respublikachilar partiyasidan AQSh prezidentligiga nomzod Donald Tramp o‘z tibbiy kartasini oshkor qilishga tayyorligini aytdi va o‘zining Demokratik partiyadan raqibi Hillari Klintonni ham shunday qilishga chaqirdi, deb yozadi “Interfaks”.

“O‘ylashimcha, har ikkala nomzod, vijdonsiz Hillari va men o‘z tibbiy kartalarimizni e’lon qilishimiz kerak. Bu men uchun cho‘t emas. Sen uchun-chi, Hillari?” — deb yozdi Tramp o‘z Twitter’ida.

Avvalroq Trampning shifokori Garold Bornstayn Respublikachilar partiyasidan nomzodning salomatligi bilan bog‘liq muammolari yo‘qligini tasdiqlagan edi.

“Uning sog‘lig‘i har kuni badantarbiya bilan shug‘ullanadigan har qanday kishinikidan yaxshiroq ham, yomonroq ham emas. U chekmaydi, ichmaydi, bu esa uzoq umr ko‘rishning asosiy sharti”, — dedi Bornstayn NBC telekanaliga bergan intervyusida.

Tramp kampaniyasining Shimoliy Virjiniya va Merilend shtatlaridagi direktori Jon Jaggers o‘tgan hafta Klinton so‘nggi paytlarda omma oldida issiq kiyimda paydo bo‘layotganiga e’tibor qaratgan va uning og‘ir xasta ekanligi va saylangan taqdirda, prezidentlik lavozimida bir yil ham ishlay olmasligini taxmin qilgan edi.