Республикачилар партиясидан АҚШ президентлигига номзод Дональд Трамп ўз тиббий картасини ошкор қилишга тайёрлигини айтди ва ўзининг Демократик партиядан рақиби Ҳиллари Клинтонни ҳам шундай қилишга чақирди, деб ёзади «Интерфакс».
«Ўйлашимча, ҳар иккала номзод, виждонсиз Ҳиллари ва мен ўз тиббий карталаримизни эълон қилишимиз керак. Бу мен учун чўт эмас. Сен учун-чи, Ҳиллари?» — деб ёзди Трамп ўз Twitter’ида.
Аввалроқ Трампнинг шифокори Гарольд Борнстайн Республикачилар партиясидан номзоднинг саломатлиги билан боғлиқ муаммолари йўқлигини тасдиқлаган эди.
«Унинг соғлиғи ҳар куни бадантарбия билан шуғулланадиган ҳар қандай кишиникидан яхшироқ ҳам, ёмонроқ ҳам эмас. У чекмайди, ичмайди, бу эса узоқ умр кўришнинг асосий шарти», — деди Борнстайн NBC телеканалига берган интервьюсида.
Трамп кампаниясининг Шимолий Виржиния ва Мэриленд штатларидаги директори Жон Жаггерс ўтган ҳафта Клинтон сўнгги пайтларда омма олдида иссиқ кийимда пайдо бўлаётганига эътибор қаратган ва унинг оғир хаста эканлиги ва сайланган тақдирда, президентлик лавозимида бир йил ҳам ишлай олмаслигини тахмин қилган эди.
Изоҳ (0)