Turkiya bosh vaziri Binoli Yildirim AQShni muxolifatchi va islom targ‘ibotchisi Fatxulla Gyulenni ekstraditsiya qilish jarayonini iloji boricha tezroq boshlashga chaqirdi, deb yozadi “TASS” Turkiyaning Daily Sabah gazetasiga tayanib.
“Biz jarayon tezlashtirilishini istaymiz. Bu odam davlat to‘ntarishiga yetakchilik qilgan. Nimani kutyapmiz? Ikki mamlakat o‘rtasidagi kelishuv aniq-ravshan”, — deya Turkiya bosh vaziri so‘zlaridan iqtibos keltirdi gazeta.
Vashington ayni paytda Anqaradan Gyulenning amalga oshmay qolgan davlat to‘ntarishiga aloqadorligi bo‘yicha dalillarni olmaganini aytdi, shu tufayli AQSh ma’muriyati Turkiya hukumatining muxolifatchini ekstraditsiya qilish so‘roviga rad javobi berishga moyil bo‘lib turibdi.
16-iyulga o‘tar kechasi Turkiyada isyonchilar guruhi davlat to‘ntarishini amalga oshirishga urindi. Fitnachilarni hisobga olmaganda, 240 dan ziyod kishi halok bo‘ldi, ikki mingdan ortiq kishi yaralandi. Anqaradagilar ushbu hodisa uchun 1999-yildan buyon AQShda yashab kelayotgan Gyulenni javobgar deb hisoblaydi.
Izoh (0)