AQSh aeronavtika va koinot kengliklarini o‘rganish milliy boshqarmasi (NASA) Marsga bo‘lajak parvozlar uchun mo‘ljallangan robotning virtual modelini yaratish uchun tanlov e’lon qildi. Tanlov g‘olibiga 1 million dollar va’da qilingan, deya xabar beradi “TASS”.
Ishlanmalar uchun asos sifatida NASA mutaxassislari tomonidan tayyorlangan Robonaut 5 versiyasini olish taklif etildi. Tanlov qatnashchilari o‘zlarining virtual nusxalarini Yerda laboratoriya sharoitida ishlab chiqilgan qator vazifalarni bajarishga o‘rgatishlariga to‘g‘ri keladi. Jumladan, gap kemada sayyora bilan aloqa yo‘qolishiga olib keladigan vaziyat ro‘y berganda amalga oshiriladigan harakatlar haqida ketmoqda.
“Aloqa bilan muammolar sharoitida faoliyat ko‘rsatishga qodir aniq va samarali robototexnika koinot parvozlari hamda Marsga ekspeditsiyalarda qo‘llanishi mumkin. Vazifa astronavtlar uchun o‘ta muhim ahamiyatga ega xavfli va murakkab topshiriqlarni bajarishdan iborat”, — deya ta’kidladi NASA Centennial Challenges dasturi menejeri Monsi Roman.
Ma’lumot uchun, NASA 2030-yillar o‘rtalarida Orion kemasi va SLS tashuvchi raketasi yordamida insonning Marsga ilk parvozini amalga oshirishni mo‘ljallamoqda.
Izoh (0)