BMTning inson huquqlari bo‘yicha oliy kommisari Zayd Ra’d al-Husayn Hindiston va Pokiston Kashmir mintaqasiga mustaqil kuzatuvchilarning kiritilishiga rozi bo‘lmayotgani munosabati bilan tashvishdaligini bildirdi. Bu haqda “TASS” xabar bermoqda.
“Men bu boradagi iltimosimni yana bir bor takrorlayman”, — deyiladi uning bayonotida.
Al-Husayn mintaqada me’yordan ortiq kuch ishlatilayotganini, zo‘ravonlikka davlat homiylik qilayotganini, o‘lganlar va yaradorlar sonining ko‘pligini, shuningdek, g‘alayonlar va to‘qnashuvlar to‘xtamayotganini ta’kidlab o‘tdi. Komissar inson huquqlarining buzilishi haqidagi xabarlarni “samimiy baholash harakatlari” muvaffaqiyatsizlikka uchraganidan afsusdaligini aytdi.
Pokiston va Hindistonning mustaqillik bayramlari arafasida Kashmir mintaqasida to‘qnashuvlar avj oldi. Ikki davlat matbuoti bir-birini provokatsiyada ayblamoqda. Jumladan, Hindiston tomoni Pokistondan yorib kirishga uringan jangarilar armiya blokpostiga hujum qilganini, to‘qnashuvlarda yetti jangari o‘ldirilganini ma’lum qildi.
Izoh (0)