Toshkentda “Axborot sohasini isloh qilish, so‘z va axborot erkinligini ta’minlashning dolzarb masalalari” mavzuida davra suhbati bo‘lib o‘tdi. Bu haqda O‘zA xabar bermoqda.
Oliy Majlis Qonunchilik palatasi Axborot va kommunikatsiya texnologiyalari masalalari qo‘mitasi tomonidan Davlat hokimiyati va boshqaruvi organlari faoliyatining ochiqligini ta’minlash va monitoring bo‘yicha Jamoatchilik kengashi bilan hamkorlikda tashkil etilgan tadbirda deputatlar, axborot sohasi mas’ul xodimlari, davlat va jamoat tashkilotlari vakillari, axborot xizmatlari, ommaviy axborot vositalari xodimlari ishtirok etdi. Tadbirda qo‘mita raisi I. Abdullayev chiqish qildi.
Tadbir ishtirokchilari davlat hokimiyati va boshqaruvi organlari faoliyatining ochiqligini ta’minlashda bajarilishi zarur bo‘lgan vazifalarga e’tibor qaratdi. O‘zbekiston Respublikasi Vazirlar Mahkamasining 2015-yil 6-noyabrdagi “Davlat hokimiyati va boshqaruvi organlari faoliyatining ochiqligi to‘g‘risida”gi qonun qoidalarini amalga oshirishga yo‘naltirilgan kompleks chora-tadbirlar ko‘rish to‘g‘risida”gi qarorining ijrosini ta’minlash, tegishli qonunosti hujjatlari bazasini shakllantirish zarurligi qayd etildi.
Qaror ijrosi doirasida Davlat hokimiyati va boshqaruvi organlari faoliyatining ochiqligini baholash va monitoring qilish tartibi ishlab chiqildi. Unga muvofiq joriy yilda Jamoat kengashi tomonidan O‘zbekistondagi davlat boshqaruvi organlarida axborot ochiqligining reytingi shakllantiriladi.
“Davlat hokimiyati va boshqaruvi organlari faoliyatining ochiqligi to‘g‘risida”gi qonunning amaldagi ijrosini ta’minlovchi va davlat hokimiyati va boshqaruvi organlari faoliyati ochiqligining yagona tartibini belgilovchi Davlat hokimiyati va boshqaruvi organlari faoliyatining ochiqligini ta’minlash bo‘yicha Reglament loyihasi tadbir ishtirokchilarining e’tiboriga havola etildi. Unda davlat organlari faoliyatining ochiqligini ta’minlash tartibi va mexanizmining talablari bayon etilgan. Jumladan, davlat hokimiyati va boshqaruvi organlari faoliyati haqidagi ma’lumotlarni e’lon qilish (chop etish), ularni rasmiy veb-saytlarga joylashtirish va yangilab borish kabi jihatlar qamrab olingan.
Tadbir davomida ochiqlikni ta’minlash bo‘yicha ijobiy tajribaga erishgan davlat organlarining axborotlari eshitildi. Davlat organlari axborot xizmatlari faoliyati samaradorligini oshirish bo‘yicha tavsiyalar berildi. So‘z va axborot erkinligini ta’minlash, sohaga oid qonunchilikni yanada takomillashtirish yuzasidan fikr almashildi.
Izoh (0)