Тошкентда «Ахборот соҳасини ислоҳ қилиш, сўз ва ахборот эркинлигини таъминлашнинг долзарб масалалари» мавзуида давра суҳбати бўлиб ўтди. Бу ҳақда ЎзА хабар бермоқда.
Олий Мажлис Қонунчилик палатаси Ахборот ва коммуникация технологиялари масалалари қўмитаси томонидан Давлат ҳокимияти ва бошқаруви органлари фаолиятининг очиқлигини таъминлаш ва мониторинг бўйича Жамоатчилик кенгаши билан ҳамкорликда ташкил этилган тадбирда депутатлар, ахборот соҳаси масъул ходимлари, давлат ва жамоат ташкилотлари вакиллари, ахборот хизматлари, оммавий ахборот воситалари ходимлари иштирок этди. Тадбирда қўмита раиси И. Абдуллаев чиқиш қилди.
Тадбир иштирокчилари давлат ҳокимияти ва бошқаруви органлари фаолиятининг очиқлигини таъминлашда бажарилиши зарур бўлган вазифаларга эътибор қаратди. Ўзбекистон Республикаси Вазирлар Маҳкамасининг 2015 йил 6 ноябрдаги «Давлат ҳокимияти ва бошқаруви органлари фаолиятининг очиқлиги тўғрисида»ги қонун қоидаларини амалга оширишга йўналтирилган комплекс чора-тадбирлар кўриш тўғрисида»ги қарорининг ижросини таъминлаш, тегишли қонуности ҳужжатлари базасини шакллантириш зарурлиги қайд этилди.
Қарор ижроси доирасида Давлат ҳокимияти ва бошқаруви органлари фаолиятининг очиқлигини баҳолаш ва мониторинг қилиш тартиби ишлаб чиқилди. Унга мувофиқ жорий йилда Жамоат кенгаши томонидан Ўзбекистондаги давлат бошқаруви органларида ахборот очиқлигининг рейтинги шакллантирилади.
«Давлат ҳокимияти ва бошқаруви органлари фаолиятининг очиқлиги тўғрисида»ги қонуннинг амалдаги ижросини таъминловчи ва давлат ҳокимияти ва бошқаруви органлари фаолияти очиқлигининг ягона тартибини белгиловчи Давлат ҳокимияти ва бошқаруви органлари фаолиятининг очиқлигини таъминлаш бўйича Регламент лойиҳаси тадбир иштирокчиларининг эътиборига ҳавола этилди. Унда давлат органлари фаолиятининг очиқлигини таъминлаш тартиби ва механизмининг талаблари баён этилган. Жумладан, давлат ҳокимияти ва бошқаруви органлари фаолияти ҳақидаги маълумотларни эълон қилиш (чоп этиш), уларни расмий веб-сайтларга жойлаштириш ва янгилаб бориш каби жиҳатлар қамраб олинган.
Тадбир давомида очиқликни таъминлаш бўйича ижобий тажрибага эришган давлат органларининг ахборотлари эшитилди. Давлат органлари ахборот хизматлари фаолияти самарадорлигини ошириш бўйича тавсиялар берилди. Сўз ва ахборот эркинлигини таъминлаш, соҳага оид қонунчиликни янада такомиллаштириш юзасидан фикр алмашилди.
Изоҳ (0)