Toshkentda qurilish: Chilonzor Oqtepa maydonida ikkita yer usti piyodalar o‘tish yo‘li qurilmoqda

Toshkentning Chilonzor Oqtepa maydonida ikkita yer usti piyodalar o‘tish yo‘li qurilishi ishlari jadal davom etmoqda.

O‘tish yo‘llaridan biri maydonning Muqimiy ko‘chasiga, ikkinchisi esa Lutfiy ko‘chasiga tutashgan qismida qurilmoqda. Loyihaga ko‘ra, o‘tish yo‘lagi kengligi 4 metrni tashkil etadi va piyodalar uchun o‘ziga xos qulaylik taqdim etadi.

Toshkent shahar hokimligidan ma’lum qilishlaricha, o‘tish yo‘llari “O‘zbekiston temir yo‘llari” AKning qurilish tashkilotlari tomonidan bunyod etilmoqda.

Bundan tashqari, “O‘zavtoyo‘l” AK “Avtomagistral birlashmasi” tashkiloti tomonidan Oqtepa maydonidagi avtomobil yo‘l kesishmasida ham keng ko‘lamli o‘zgarishlar olib borilmoqda.

Xususan, Lutfiy, Muqimiy, Baynalmilal, Gulxaniy, Samarqand Darvoza ko‘chalari va Nurafshon ko‘chasining yangi qurilgan qismini o‘zaro bog‘lovchi yo‘llar qariyb tayyor holga kelgan, u yerda ayni vaqtda so‘nggi montaj, pardozlash, obodonlashtirish va ko‘kalamzorlashtirish ishlari olib borilmoqda.

Qayd etilgan obyektlardagi qurilish ishlari va rekonstruksiyasi O‘zbekiston Mustaqilligining 25 yilligi arafasida yakunlanishi rejalashtirilgan.

Ma’lumot uchun, Toshkentda piyodalarning yer usti o‘tish yo‘llari ilk bor Sebzorda qurilgan edi. Ayni vaqtda, Chilonzor Oqtepa maydonidan tashqari, Muqimiy — Shota Rustaveli ko‘chalari kesishmasi yaqinida ham shunday o‘tish yo‘li qurilmoqda.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.