Rossiya prezidenti Vladimir Putin Suriyaning Latakiya viloyatidagi Xmeymim aerodromi hududiga Rossiya qurolli kuchlari aviaguruhini muddatsiz joylashtirish to‘g‘risidagi Rossiya va Suriya o‘rtasidagi bitim loyihasini ratifikatsiya qilish uchun Rossiya parlamenti quyi palatasiga kiritdi. Bu haqda palata rasmiy saytida axborot berilgan.
Qayd etilishicha, Rossiya aviaguruhi Suriya tomoni iltimosiga ko‘ra Xmeymimga joylashtiriladi, Rossiya tomoni esa aerodromdan beg‘araz foydalanadi. Aviaguruhdan tomonlar o‘rtasida kelishilgan rejaga asosan foydalaniladi, guruhning tarkibi Suriya bilan kelishilgan holda Rossiya tomonidan shakllantiriladi.
Avvalroq, 29-iyul kuni Rossiya hukumati Suriya hududiga rus aviaguruhini joylashtirish bo‘yicha bitimni ma’qullagani va uni Rossiya parlamenti quyi palatasiga ratifikatsiyaga kiritish uchun Putinga taqdim etgani ma’lum qilingan edi. Bitim 2015-yil 26-avgustida Damashqda imzolangan.
Ma’lumot uchun, Suriyada 2015-yil sentabridan beri Rossiya harbiy aviaguruhi va uni ta’minlovchi bo‘linmalar faoliyat olib bormoqda, o‘sha yilning 30-sentabridan boshlab Rossiya harbiy aviatsiyasi, Suriya prezidenti Bashar Asadning iltimosiga ko‘ra, mamlakat hududidagi terrorchilik tashkilotlari marralariga zarba berishni boshlagan. 2016-yilning 14-mart kuni Putin Suriyadagi rus harbiy kontingentini Rossiyaga qaytarish haqida ko‘rsatma bergan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)