Turkiya yetakchisi Rajab Toyyib Erdo‘g‘on Rossiya prezidenti Vladimir Putin bilan muzokaralar o‘tkazish uchun 9-avgust, seshanba kuni Sankt-Peterburg shahriga keldi. “Interfaks” xabariga ko‘ra, ikki mamlakat rahbarlarining uchrashuvi shahardagi Konstantin saroyida bo‘lib o‘tadi.
Xabar berishlaricha, ikki prezident o‘rtasida dastlab tor doirada muzokaralar bo‘lib o‘tadi. Unda, shuningdek, Rossiya tashqi ishlar vaziri Sergey Lavrov va uning turkiyalik hamkasbi Mavlut Chavusho‘g‘li, Putinning yordamchisi Yuriy Ushakov va Erdo‘g‘on ma’muriyati bosh kotibi o‘rinbosari Ibrohim Kalin ishtirok etadi. Shundan so‘ng kengaytirilgan tarkibda muzokaralar o‘tkazilishi ko‘zda tutilgan.
Qayd etish joiz, bu Erdo‘g‘onning Turkiyadagi davlat to‘ntarishiga urinishdan so‘ng birinchi xorij safari hisoblanadi. Ayni vaqtda, bu Putin va Erdo‘g‘onning 2015-yil noyabrida rus qiruvchi samolyotining turk harbiylari urib tushirgani oqibatida Rossiya-Turkiya munosabatlari sovib ketganidan keyingi birinchi uchrashuvidir.
Erdo‘g‘on “tarixiy voqea” deb ta’riflagan bo‘lajak uchrashuvlarda Turkiya va Rossiya prezidentlari ikki tomonlama munosabatlarning barcha muhim yo‘nalishlarini — energetika va oziq-ovqat mahsulotlarini yetkazib berishdan tortib turizmgacha, shuningdek, Rossiyada Turkiya qurilish kompaniyalariga nisbatan joriy etilgan cheklovlarni bekor qilish masalalarini ham ko‘rib chiqadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)