Россия президенти Владимир Путин Суриянинг Латакия вилоятидаги Хмеймим аэродроми ҳудудига Россия қуролли кучлари авиагуруҳини муддатсиз жойлаштириш тўғрисидаги Россия ва Сурия ўртасидаги битим лойиҳасини ратификация қилиш учун Россия парламенти қуйи палатасига киритди. Бу ҳақда палата расмий сайтида ахборот берилган.
Қайд этилишича, Россия авиагуруҳи Сурия томони илтимосига кўра Хмеймимга жойлаштирилади, Россия томони эса аэродромдан беғараз фойдаланади. Авиагуруҳдан томонлар ўртасида келишилган режага асосан фойдаланилади, гуруҳнинг таркиби Сурия билан келишилган ҳолда Россия томонидан шакллантирилади.
Аввалроқ, 29 июль куни Россия ҳукумати Сурия ҳудудига рус авиагуруҳини жойлаштириш бўйича битимни маъқуллагани ва уни Россия парламенти қуйи палатасига ратификацияга киритиш учун Путинга тақдим этгани маълум қилинган эди. Битим 2015 йил 26 августида Дамашқда имзоланган.
Маълумот учун, Сурияда 2015 йил сентябридан бери Россия ҳарбий авиагуруҳи ва уни таъминловчи бўлинмалар фаолият олиб бормоқда, ўша йилнинг 30 сентябридан бошлаб Россия ҳарбий авиацияси, Сурия президенти Башар Асаднинг илтимосига кўра, мамлакат ҳудудидаги террорчилик ташкилотлари марраларига зарба беришни бошлаган. 2016 йилнинг 14 март куни Путин Суриядаги рус ҳарбий контингентини Россияга қайтариш ҳақида кўрсатма берган эди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)