Hindiston hukumati mamlakat mudofaa vazirligining Xitoy bilan chegara yaqinida tovushdan tez BrahMos qanotli raketalarini joylashtirish haqidagi taklifini ma’qulladi. Bu haqda Times of India manbalariga tayanib, “TASS” xabar bermoqda.
Nashrga ko‘ra, bosh vazir Narendra Modi raisligida bo‘lib o‘tgan xavfsizlik bo‘yicha hukumat qo‘mitasi yig‘ilishida Xitoy bilan chegara yaqinida 100 ta BrahMos raketasiga ega beshta mobil uchirish qurilmasi va harakatlanuvchi qo‘mondonlik punktidan iborat raketa divizionini joylashtirishga qaror qilindi.
Raketa 1998-yilda Hindiston mudofaa tadqiqotlari va ishlanmalari tashkiloti hamda Rossiyaning “NPO Mashinostroyeniya” birlashmasi tomonidan hamkorlikda tashkil etilgan BrahMos Aerospace kompaniyasining mahsuloti bo‘lib, tovush tezligidan 3 barobar oshiq tezlikka ega. 15 kilometrgacha balandlikda uchishga qodir raketa 200—300 kilogramm og‘irlikdagi jangovar kallakni eltadi. Uning nomi Hindistondagi Braxmaputra va Rossiyadagi Moskva daryolari birikmasidan olingan.
Tog‘li hududlardagi nishonlarni mo‘ljalga olishga qodir yangi modifikatsiyadagi BrahMos raketalari mamlakat shimoli-sharqidagi Arunachal-Pradesh shtatida joylashtirilishi rejalashtirilgan.
Izoh (0)