Ostonada Qozog‘iston milliy geografiya jamiyatining (QazaqGeo) 12 kun davom etgan Ulitau—Aral ilmiy-tadqiqot ekspeditsiyasi yakunlari ko‘rib chiqildi. Bu haqda Tengrinews xabar bermoqda.
Ekspeditsiyaning 30 nafar a’zosi — olimlar, jurnalistlar, blogerlar, fotosuratchilar va volontyorlar 40 darajali jaziramada 4 000 kilometrdan oshiq yo‘l bosdi. Ko‘plab obyektlar, jumladan, mashhur Borsakelmas oroli, Boyqo‘ng‘ir shahriga borildi, Shimoliy Orol, dengiz tubidan topilgan Kerderi qadim shahri, Yangikent shahar-qal’asi vayronalari o‘rganildi. Kelgusida gidrobiologik izlanishlar o‘tkazish uchun Orol dengizi suvi olindi. Mamlakatning markaziy qismini Ulitau orqali Orol mintaqasi bilan bog‘lovchi dala va shosse yo‘llari asosida yangi sayyohlik yo‘nalishi ishlab chiqildi.
Ekspeditsiyada ishtirok etgan gidrobiologlar Oroldagi ekologik vaziyat yaxshilanganini qayd etdi. “Eng asosiy natija — dengiz Shimoliy Orol qismida tiklanmoqda, unga hayot qaytmoqda. Tuzlar ko‘tarilmoqda, o‘simlik dunyosi tiklanmoqda, baliqlar paydo bo‘ldi. Cho‘l landshaftining yarim sahro, hatto dasht ko‘rinishiga kelishi jarayoni ketmoqda”, — deya ta’kidladi ekspeditsiya rahbari Saulet Sakenov.
Ko‘koroldagi to‘g‘on dengizning bir qismini qutqarish uchun asos yaratishga ko‘mak berdi. Bu yerda QazaqGeo va Orolni qutqarish xalqaro fondi hamkorlik haqida memorandumni imzoladi. Ushbu memorandum doirasida Orol dengizini saqlab qolishga qaratilgan qo‘shma loyihalar amalga oshirilishi ko‘zda tutilgan.
Tadqiqotchilar ekspeditsiya yakunlari bo‘yicha quyidagi xulosaga keldi: Orol tiklanmoqda, sahro asta-sekin chekinmoqda. Dengizni qutqarishga qaratilgan ishlar izchil davom ettiriladi.
Izoh (0)