New Horizons kosmik qurilmasi bortida Plutonga sayohatga uchirilgan Amerika pochta markasi Ginnesning Rekordlar kitobiga kiritildi, deb yozadi “TASS”. AQSh Pochta xizmati ma’lum qilishicha, u Yerdan 5 milliard km masofaga uchib, barcha pochta markalari ichida eng uzoq yo‘lni bosib o‘tdi.
“Endi ushbu g‘aroyib hodisa rasman e’tirof etildi”, — dedi Ginnesning Rekordlar kitobi vakili Jimmi Koggins loyiha ilmiy rahbari Alan Sternga sertifikat topshirar ekan.
New Horizons o‘n yil avval uchirilgan va o‘tgan yilning iyulida o‘z safarining bosh manzili — Plutonga yetib borgan edi. Mitti sayyora yonidan soniyasiga 14 km tezlikda uchib o‘tib, kosmik qurilma uning tuzilmasi va atmosfera tarkibi haqidagi noyob axborotni uzatdi.
Sternning eslatishicha, 1991-yilda chiqarilgan 29 sentli pochta markasiga mitti sayyoraning tasviri bilan birga, “Pluton hali o‘rganilmadi” yozuvi tushirilgan edi, u kosmik qurilmani yaratish ustida ishlagan butun jamoaning shioriga aylangan. O‘tgan yilning iyulida New Horizons Plutonning yaqinidan uchib o‘tgach, marka muomaladan chiqarilgan.
Izoh (0)