Noma’lum shaxslar Qozog‘iston Milliy xavfsizlik qo‘mitasi Olmaota shahar departamenti va shaharning Almali tumani politsiya departamenti binolariga hujum uyushtirdi. “TASS” xabariga ko‘ra, shaharda terrorchilik tahdidining “qizil” darajasi e’lon qilingan.
Shahar ichki ishlar departamentidan ma’lum qilishlaricha, Olmaotada aksilterror operatsiyasi o‘tkazilmoqda. Shu munosabat bilan, politsiya aholini “uylarni tark etmaslikka, gavjum joylarni tark etishga, shubhali shaxslar haqida huquqni muhofaza qilish organlariga zudlik bilan xabar berishga” chaqirmoqda.
Avvalroq qora libos kiygan soqolli noma’lum shaxs Olmaotaning Almali tumani ichki ishlar departameti binosi oldidagi politsiyachilarga qarata o‘t ochgani, so‘ng ko‘cha bo‘ylab yugurib, o‘q uzishda davom etgani ma’lum bo‘lgandi. Bir necha tumanlar politsiya tomonidan o‘rab olingan, shaharda o‘q ovozlari eshitilmoqda.
Tasdiqlanmagan ma’lumotlarga ko‘ra, otishma natijasida uch politsiyachi yaralangan. Olmaotadagi tez tibbiy yordam kasalxonasi vakillari esa muassasaga besh kishi tan jarohatlari bilan olib kelinganini ma’lum qilgan. Tengrinews.kz portalining xabar berishicha, politsiya bo‘linmalari Olmaota vokzalini o‘rab olgan.
Izoh (0)