Номаълум шахслар Қозоғистон Миллий хавфсизлик қўмитаси Олмаота шаҳар департаменти ва шаҳарнинг Алмали тумани полиция департаменти биноларига ҳужум уюштирди. «ТАСС» хабарига кўра, шаҳарда террорчилик таҳдидининг «қизил» даражаси эълон қилинган.
Шаҳар ички ишлар департаментидан маълум қилишларича, Олмаотада аксилтеррор операцияси ўтказилмоқда. Шу муносабат билан, полиция аҳолини «уйларни тарк этмасликка, гавжум жойларни тарк этишга, шубҳали шахслар ҳақида ҳуқуқни муҳофаза қилиш органларига зудлик билан хабар беришга» чақирмоқда.
Аввалроқ қора либос кийган соқолли номаълум шахс Олмаотанинг Алмали тумани ички ишлар департамети биноси олдидаги полициячиларга қарата ўт очгани, сўнг кўча бўйлаб югуриб, ўқ узишда давом этгани маълум бўлганди. Бир неча туманлар полиция томонидан ўраб олинган, шаҳарда ўқ овозлари эшитилмоқда.
Тасдиқланмаган маълумотларга кўра, отишма натижасида уч полициячи яраланган. Олмаотадаги тез тиббий ёрдам касалхонаси вакиллари эса муассасага беш киши тан жароҳатлари билан олиб келинганини маълум қилган. Tengrinews.kz порталининг хабар беришича, полиция бўлинмалари Олмаота вокзалини ўраб олган.
Изоҳ (0)