14-iyul, payshanba kuni kechqurun Fransiyaning Nitssa shahrida odamlarning ustiga bostirib borgan yuk mashinasining ichida shaxsni tasdiqlovchi ikkinchi hujjat topildi. Bu haqda Fransiyaning iTele telekanaliga tayanib, “RBK” xabar bermoqda.
Hujjat kimga tegishli ekani hozircha noma’lum. Avvalroq politsiya xodimlari terakt ijrochisi shaxsini yonida olib yurgan hujjatlar orqali aniqladi va uning uyida tintuv ishlarini olib bordi.
So‘nggi ma’lumotlarga ko‘ra, terakt oqibatida halok bo’lganlar soni 84 kishiga yetdi, yana 18 kishi og‘ir ahvolda yotibdi.
Nice-Matin nashrining qayd etishicha, hujumni uyushtirgan shaxs kelib chiqishi tunislik bo‘lgan fransiyalik 31 yoshli Muhammad Laxuayej Buxlel bo‘lgan. Avvalroq u qurol olib yurganlik va boshqa jinoyatlar uchun javobgarlikka tortilgan, ammo ular terrorchilikka aloqador bo‘lmagan. Fransiya maxsus xizmati uni kuzatib bormagan.
Izoh (0)