Mey va Obama o‘z mamlakatlari o‘rtasidagi “alohida munosabatlar”ni saqlab qolish muhimligini qayd etdi

Buyuk Britaniya bosh vaziri Tereza Mey va AQSh prezidenti Barak Obama 14-iyul kuni bo‘lib o‘tgan telefon suhbatida Vashington va London o‘rtasidagi an’anaviy yaqin aloqalarga berilgan “alohida munosabatlar” ta’rifini saqlab qolish zaruriyatini ta’kidladi. Bu haqda Britaniya hukumati rahbarining rasmiy vakiliga tayanib, “TASS” xabar berdi.

“Ular o‘ziga xos munosabatlarni ham, ularni qo‘llab-quvvatlab turishni ham muhim deb atadi”, — dedi Dauning-stritdagi qarorgoh xodimasi.

Uning so‘zlariga ko‘ra, bosh vazir Buyuk Britaniya xalqaro muammolar, jumladan, terrorizmga qarshi kurash va xavfsizlikni ta’minlash bo‘yicha AQShning asosiy sherigi bo‘lishda davom etishi kerakligini, shuningdek, ikki mamlakat o‘rtasida razvedka ma’lumotlari almashinuvi zarurligini ta’kidladi.

Avvalroq Konservatorlar partiyasi yetakchisi, ichki ishlar vaziri Tereza Mey rasman Buyuk Britaniya bosh vaziri etib tayinlangan edi.