AQShda avtopilot rejimida harakatlanayotgan Tesla Motors kompaniyasining elektrokarlari ishtirokida ikkita yangi avariya yuz berdi. Bu haqda 12-iyul, seshanba kuni CNN telekompaniyasi ma’lum qildi, deya xabar bermoqda “TASS”.
Hodisalar 9-iyul kuni Montana va 1-iyul kuni Pensilvaniyada yuz berdi.
Birinchi holatda Vashington shtatidan Yellouston Milliy parkiga (Kaliforniya shtati) soatiga 96,6 kilometr tezlik bilan harakatlanayotgan Model X krossoveri shamolli havoda o‘ngga surilib ketgan. Mashina yo‘l yoqasidagi bir nechta daraxtni urib ketgan va simyog‘ochga to‘qnashgan. Haydovchi va yo‘lovchi jabrlanmagan.
Ikkinchi holatda 77 yoshli Albert Skalione (rulda u bo‘lgan) qarindoshi bilan Tesla Motors elektrokarida Pittsburg shahridan 160 kilometr masofadagi tezyurar trassada ag‘darilib ketgan. Skalione avtopilot yoniq ekanligini ta’kidlagan, biroq boshqa tafsilotlarni keltirmagan. Unga va yo‘lovchiga tibbiy yordam ko‘rsatilgandan so‘ng, o‘sha kunning o‘zidayoq shifoxonadan javob berilgan.
Eslatib o‘tamiz, 7-may kuni Tesla avtomobili birinchi marta o‘limga olib kelgan yo‘l-transport hodisasiga uchragandi. AQSh Harakat xavfsizligi milliy boshqarmasi (NHTSA) ushbu hodisa yuzasidan surishtiruv ishlarini olib bormoqda.
Izoh (0)