Rossiya prezidenti Vladimir Putin ma’muriyati rahbari Sergey Ivanov televideniyega bergan intervyusida asosan Rossiyaga qarshi kiritilgan sanksiyalar sharofati bilan mamlakatda ko‘plab sohalar rivojlanayotganini aytdi, deb yozadi “RBK”. Ivanov Rossiyaga qarshi sanksiyalar “ko‘proq davom etishi”ni istashini ta’kidladi.
“Agar sanksiyalar bekor qilinsa, biz darhol kontrsanksiyalarni ham bekor qilamiz, bu tushunarli. Xo‘sh, shunda nima bo‘ladi? Men nima demoqchiman? Shaxsan men bizga qarshi sanksiyalar tezroq olib tashlanishini emas, uzoqroq saqlanib turishini istardim. Bu mening shaxsiy fikrim”, — dedi Ivanov.
“Biz iqtisodiyotni diversifikatsiya qilish haqida uzoq vaqtdan buyon gapirib kelardik. Shunday maqol bor: baxtsizlik bo‘lmaganida, baxt ham bo‘lmasdi. Bu yerda aynan shu maqol qo‘l keldi”, — deya ta’kidladi u.
Ivanovning so‘zlariga ko‘ra, asosan sanksiyalar tufayli, qishloq xo‘jaligi, kimyo kabi sohalar o‘smoqda. “Xorijiy investorlar bu haqda ochiq aytgan — o‘sish yiliga 30—35 foizga teng. Bundan faxrlanish kerak!” — deya qayd etdi Ivanov.
Izoh (0)