Россия президенти Владимир Путин маъмурияти раҳбари Сергей Иванов телевидениега берган интервьюсида асосан Россияга қарши киритилган санкциялар шарофати билан мамлакатда кўплаб соҳалар ривожланаётганини айтди, деб ёзади «РБК». Иванов Россияга қарши санкциялар «кўпроқ давом этиши»ни исташини таъкидлади.
«Агар санкциялар бекор қилинса, биз дарҳол контрсанкцияларни ҳам бекор қиламиз, бу тушунарли. Хўш, шунда нима бўлади? Мен нима демоқчиман? Шахсан мен бизга қарши санкциялар тезроқ олиб ташланишини эмас, узоқроқ сақланиб туришини истардим. Бу менинг шахсий фикрим», — деди Иванов.
«Биз иқтисодиётни диверсификация қилиш ҳақида узоқ вақтдан буён гапириб келардик. Шундай мақол бор: бахтсизлик бўлмаганида, бахт ҳам бўлмасди. Бу ерда айнан шу мақол қўл келди», — дея таъкидлади у.
Ивановнинг сўзларига кўра, асосан санкциялар туфайли, қишлоқ хўжалиги, кимё каби соҳалар ўсмоқда. «Хорижий инвесторлар бу ҳақда очиқ айтган — ўсиш йилига 30—35 фоизга тенг. Бундан фахрланиш керак!» — дея қайд этди Иванов.
Изоҳ (0)