13-iyun, dushanba kuni AQShning Yangi Orlean shahrida yopiq anjuman bo‘lib o‘tdi, unda Amerika diabetga qarshi kurash assotsiatsiyasi Novo Nordisk A/S kompaniyasining yangi dorisi — Victoza bo‘yicha tadqiqotlar ma’lumotlarini taqdim etdi, deb yozadi TJournal.
Ma’lumotlar maxfiy bo‘lgani tufayli, tadbir tashkilotchilari bir necha yuz kishilik mehmonlardan ularni ijtimoiy tarmoqlarga tarqatmaslikni maxsus so‘radi, ammo ular o‘zlarini bundan tiya olmadi.
Dorining samaradorligi haqidagi ma’lumotlar aks etgan slaydlarni hech qayerda e’lon qilmaslik haqida slaydlarning o‘zida ham ogohlantirilgan edi. Xavfsizlik choralari shu bilan bog‘liq ediki, Yangi Orleandagi xususiy taqdimotdan bir necha soat o‘tgach, tadqiqot natijalari ommaga e’lon qilinishi kerak edi, ma’lumotlarning oldindan tarqatilishi esa embargoga zid bo‘lardi.
Ammo Twitter’da shu zahotiyoq slayd fotosuratlari paydo bo‘ldi, ularda Victoza infarkt va insultlar yuzaga kelishi xavfini 13 foizga, ular natijasida o‘lim holatlarini esa 22 foizga kamaytirishi qayd etilgan edi.
Amerika diabetga qarshi kurash assotsiatsiyasi slaydlarni internetdan o‘chirib tashlashga urindi, biroq bu behuda bo‘ldi — ma’lumotlar allaqachon ijtimoiy tarmoqlar bo‘ylab tarqalib bo‘lgan edi.
Ertasi kuni Novo Nordisk A/S aksiyalari 5,6 foizga pasaydi, natijada kompaniyaning bozordagi narxi 7,77 milliard dollarga tushdi. Investorlar tadqiqot natijalaridan mamnun bo‘lmadi: tahlilchilar Victoza 13 foiz emas, kamida 15 foiz samaradorlik ko‘rsatishiga umid qilayotgan edi.
Izoh (0)