13 июнь, душанба куни АҚШнинг Янги Орлеан шаҳрида ёпиқ анжуман бўлиб ўтди, унда Америка диабетга қарши кураш ассоциацияси Novo Nordisk A/S компаниясининг янги дориси — Victoza бўйича тадқиқотлар маълумотларини тақдим этди, деб ёзади TJournal.
Маълумотлар махфий бўлгани туфайли, тадбир ташкилотчилари бир неча юз кишилик меҳмонлардан уларни ижтимоий тармоқларга тарқатмасликни махсус сўради, аммо улар ўзларини бундан тия олмади.
Дорининг самарадорлиги ҳақидаги маълумотлар акс этган слайдларни ҳеч қаерда эълон қилмаслик ҳақида слайдларнинг ўзида ҳам огоҳлантирилган эди. Хавфсизлик чоралари шу билан боғлиқ эдики, Янги Орлеандаги хусусий тақдимотдан бир неча соат ўтгач, тадқиқот натижалари оммага эълон қилиниши керак эди, маълумотларнинг олдиндан тарқатилиши эса эмбаргога зид бўларди.
Аммо Twitter’да шу заҳотиёқ слайд фотосуратлари пайдо бўлди, уларда Victoza инфаркт ва инсультлар юзага келиши хавфини 13 фоизга, улар натижасида ўлим ҳолатларини эса 22 фоизга камайтириши қайд этилган эди.
Америка диабетга қарши кураш ассоциацияси слайдларни интернетдан ўчириб ташлашга уринди, бироқ бу беҳуда бўлди — маълумотлар аллақачон ижтимоий тармоқлар бўйлаб тарқалиб бўлган эди.
Эртаси куни Novo Nordisk A/S акциялари 5,6 фоизга пасайди, натижада компаниянинг бозордаги нархи 7,77 миллиард долларга тушди. Инвесторлар тадқиқот натижаларидан мамнун бўлмади: таҳлилчилар Victoza 13 фоиз эмас, камида 15 фоиз самарадорлик кўрсатишига умид қилаётган эди.
Изоҳ (0)