AQShning Sinsinnati shahri (Ogayo shtati) hayvonot bog‘idagi gorilla maydonchasiga qulab tushgan to‘rt yoshli bolaning onasi Mishel Gregg Facebook’dagi sahifasida mazkur hodisaga “noxushliklar bo‘lib turadi” deya izoh berdi. Bu haqda Metro ma’lum qildi.
“Mutasaddilar uni qutqargunicha xudoning o‘zi bolamni asradi. Uning miyasi chayqalgan va bir necha yara-chaqasi bor, xolos. Hech yeri sinmagan, ichki lat yeyishlar yo‘q. Bolalarimni qanchalik diqqat bilan kuzatib yurishimni bilsangiz edi. Noxushliklar bo‘lib turadi, biroq kerakli odamlar zarur joyda bo‘lganidan xursandman”, — deya yozgan to‘rt bolaning onasi bo‘lgan Gregg.
Bolani o‘n daqiqa atrofida ko‘tarib yurgan Xarambe laqabli 17 yoshli maymun hayvonot bog‘i xodimlari tomonidan otib o‘ldirilganidan so‘ng “Change.org” saytida farzandini qarovsiz qoldirgan ota-onani jazolashga chaqirilgan talabnoma joylashtirildi. Hozirgacha uni 200 mingdan ortiq kishi qo‘llab-quvvatladi.
Izoh (0)