АҚШнинг Цинциннати шаҳри (Огайо штати) ҳайвонот боғидаги горилла майдончасига қулаб тушган тўрт ёшли боланинг онаси Мишель Грегг Facebook’даги саҳифасида мазкур ҳодисага «нохушликлар бўлиб туради» дея изоҳ берди. Бу ҳақда Metro маълум қилди.
«Мутасаддилар уни қутқаргунича худонинг ўзи боламни асради. Унинг мияси чайқалган ва бир неча яра-чақаси бор, холос. Ҳеч ери синмаган, ички лат ейишлар йўқ. Болаларимни қанчалик диққат билан кузатиб юришимни билсангиз эди. Нохушликлар бўлиб туради, бироқ керакли одамлар зарур жойда бўлганидан хурсандман», — дея ёзган тўрт боланинг онаси бўлган Грегг.
Болани ўн дақиқа атрофида кўтариб юрган Харамбе лақабли 17 ёшли маймун ҳайвонот боғи ходимлари томонидан отиб ўлдирилганидан сўнг «Change.org» сайтида фарзандини қаровсиз қолдирган ота-онани жазолашга чақирилган талабнома жойлаштирилди. Ҳозиргача уни 200 мингдан ортиқ киши қўллаб-қувватлади.
Изоҳ (0)