NATO harbiy qo‘mitasi rahbari Janubiy Koreyaga tashrif bilan keldi

NATO harbiy qo‘mitasi raisi general Petr Pavel 30-may, dushanba kuni Janubiy Koreyaga to‘rt kunlik tashrif bilan yetib keldi, deya xabar bermoqda “RIA Novosti” Janubiy Koreyaning “Ryonxap” axborot agentligiga tayanib.

Uning ma’lumotlariga ko‘ra, NATO generali shu kuniyoq Janubiy Koreya qurolli kuchlari shtablari boshliqlari qo‘mitasi raisi Li Son Chjin bilan uchrashib, harbiy hamkorlik yo‘llarini muhokama qiladi.

Ushbu tashrif davomida Petr Pavel, shuningdek, Janubiy Koreya mudofaa vaziri Xan Min Gu bilan uchrashuv o‘tkazishni va Janubiy Koreya davlatini KXDRdan ajratib turuvchi qurolsizlantirilgan hududdagi Pxanmunjom muzokaralar punktiga tashrif buyurishni rejalashtirmoqda.

Agentlik ta’kidlashicha, bu NATO harbiy qo‘mitasi raisining Janubiy Koreyaga birinchi tashrifidir.