2016-yil 23-may kuni O‘zbekiston Respublikasi Mehnat vazirligida Mehnat vaziri Aziz Abduhakimov YuNISEFning O‘zbekiston Respublikasidagi vakolatxonasi rahbari Robert Fuderich bilan uchrashdi. Bu haqda O‘zbekiston Respublikasi Mehnat vazirligi matbuot xizmati “Daryo”ga ma’lum qildi.
Uchrashuv avvalida Robert Fuderich Mehnat vaziriga tez orada YuNISEFning O‘zbekistondagi vakili sifatidagi faoliyatini tugatayotganligi haqida ma’lum qildi. Shu munosabat bilan har ikki tomon vakillari o‘tgan davr mobaynida aholini ijtimoiy muhofaza qilish va bandligini ta’minlash borasida o‘rnatilgan muvaffaqiyatli hamkorlik uchun o‘zaro minnatdorchilik bildirdi.
Uchrashuvda Fuderich va Abduhakimov BMT agentliklari va O‘zbekiston hukumati vakillarining ijtimoiy muhofaza qilishga oid vazifalarini to‘liq amalga oshirishga xizmat qilgan ishchi guruh faoliyati xususida to‘xtalib, mazkur guruh tomonidan 2016—2017-yillarda amalga oshiriladigan chora-tadbirlar qo‘shma rejasini alohida ta’kidlab o‘tdi. Ayni paytda ikki tomonlama hamkorlik doirasida amalga oshirilayotgan ishlar yuqori darajada davom ettirishiga ishonch bildirdi.
Muloqot yakunida amaliy tashabbuslarni birgalikda tatbiq etish borasida aniq kelishuvga kelindi. Xususan, davlat tashkilotlari hamda BMT agentliklarining besh yillik qo‘shma dasturi doirasida amalga oshirilgan ishlarga oid tahliliy hisobotlar, statistik ma’lumotlar, yangiliklar hamda nogiron bolalar va kattalarning savollari, fikrlarini o‘zida mujassam etuvchi forum uchun mo‘ljallangan veb-sayt ochish taklifi ma’qullandi.
Izoh (0)