2016 йил 23 май куни Ўзбекистон Республикаси Меҳнат вазирлигида Меҳнат вазири Азиз Абдуҳакимов ЮНИСЕФнинг Ўзбекистон Республикасидаги ваколатхонаси раҳбари Роберт Фудерич билан учрашди. Бу ҳақда Ўзбекистон Республикаси Меҳнат вазирлиги матбуот хизмати «Дарё»га маълум қилди.
Учрашув аввалида Роберт Фудерич Меҳнат вазирига тез орада ЮНИСЕФнинг Ўзбекистондаги вакили сифатидаги фаолиятини тугатаётганлиги ҳақида маълум қилди. Шу муносабат билан ҳар икки томон вакиллари ўтган давр мобайнида аҳолини ижтимоий муҳофаза қилиш ва бандлигини таъминлаш борасида ўрнатилган муваффақиятли ҳамкорлик учун ўзаро миннатдорчилик билдирди.
Учрашувда Фудерич ва Абдуҳакимов БМТ агентликлари ва Ўзбекистон ҳукумати вакилларининг ижтимоий муҳофаза қилишга оид вазифаларини тўлиқ амалга оширишга хизмат қилган ишчи гуруҳ фаолияти хусусида тўхталиб, мазкур гуруҳ томонидан 2016—2017 йилларда амалга ошириладиган чора-тадбирлар қўшма режасини алоҳида таъкидлаб ўтди. Айни пайтда икки томонлама ҳамкорлик доирасида амалга оширилаётган ишлар юқори даражада давом эттиришига ишонч билдирди.
Мулоқот якунида амалий ташаббусларни биргаликда татбиқ этиш борасида аниқ келишувга келинди. Хусусан, давлат ташкилотлари ҳамда БМТ агентликларининг беш йиллик қўшма дастури доирасида амалга оширилган ишларга оид таҳлилий ҳисоботлар, статистик маълумотлар, янгиликлар ҳамда ногирон болалар ва катталарнинг саволлари, фикрларини ўзида мужассам этувчи форум учун мўлжалланган веб-сайт очиш таклифи маъқулланди.
Изоҳ (0)