O‘zbekiston poytaxti va hududlaridagi o‘qituvchilar videoseminarlar orqali aloqada bo‘ladi

BMT bolalar jamg‘armasi (YuNISEF) Respublika ta’lim markaziga ta’lim sohasi mutaxassislari bilan onlayn-seminarlar o‘tkazish uchun multimedia qurilmasini taqdim etdi, deb yozadi “Gazeta.uz” YuNISEFning Toshkentdagi vakolatxonasiga tayanib.

Ushbu tashabbus YuNISEF va O‘zbekiston Xalq ta’limi vazirligi qo‘shma dasturining bir qismidir.

“Multimedia uskunasi ko‘p sonli o‘qituvchi va metodistlarga zarur ko‘mak va axborotni tezkorlik bilan qo‘lga kiritish imkoniyatini berishiga umid qilamiz”, — dedi YuNISEFning O‘zbekistondagi ta’lim bo‘limi rahbari Afshin Parsi.

Respublika ta’lim markazi metodistlari yangi uskunani respublika hududlaridagi o‘qituvchilarga o‘z vaqtida ko‘mak va ko‘rsatmalar berish uchun ishlatadi. Multimedia texnologiyalari, shuningdek, xalqaro institutlar bilan bilim va tajriba ayirboshlashga xizmat qilishi kutilmoqda.