Odil Ahmedov harakat qiladigan “Krasnodar” Rossiya chempionligidan umidini uzdi

O‘zbekistonlik futbolchi to‘p suradigan Rossiyaning “Krasnodar” klubi qatorasiga uchinchi mavsum Yevropa Ligasida ishtirok etish huquqini qo‘lga kiritdi.

• Odil Ahmedov “Krasnodar” bilan shartnomasini 2019-yilgacha uzaytirdi

• Odil Ahmedov: “Krasnodar” Rossiya Kubogi va chempionligi uchun kurashadi

Rossiya Premyer-ligasida 2015/16-yilgi mavsum yakuniga 2 ta tur qolganida “Krasnodar” mamlakat chempionligi uchun imkoniyatlarini saqlab turgandi. Biroq 29-turga kelib jamoa chempionlik uchun asosiy da’vogar bo‘lgan Moskvaning “SSKA” klubidan mag‘lub bo‘ldi va nazariy jihatdan chempionlik uchun imkoniyatlarini yo‘qotdi. Qayd etish kerak, jarohati sabab Odil Ahmedov jamoadoshlariga yordam bera olmadi.

• O‘zbekiston termasi sardori Odil Ahmedov “Krasnodar” safida jarohat oldi

Mavsum yakuniga bitta tur qolganida chempion jamoa nomi aniq bo‘lib ulgurmasada, Chempionlar Ligasi va Yevropa Ligasida to‘p suradigan jamoalar nomiga oydinlik kiritildi. Unga ko‘ra, kelasi mavsum Yevropa Chempionlar Ligasida Rossiya sharafini “SSKA” va “Rostov” klublari himoya qiladi.

So‘nggi tur oldidan “SSKA” ta’qibchisini 2 ochko ortda qoldirmoqda. 30-turda Moskva “armiyachilar”i Qozonda Rubin mehmoni bo‘lsa, “Rostov”ni Grozniyda “Terek”ka qarshi bellashuv kutib turibdi.

Yevropa Ligasida “Zenit” va “Krasnodar” klublarining qatnashishi aniq bo‘lib ulgurdi. Uchinchi yo‘llanma katta ehtimol bilan Moskvaning “Spartak” klubiga nasib qiladi.

• Odil Ahmedov “Krasnodar”dan ketish niyati yo‘qligini bildirdi

“Spartak” ta’qibchisi “Lokomotiv”dan 3 ochko ko‘proq jamg‘argan. So‘nggi turda har ikki klub Premyer-ligada jon saqlab qolish uchun kurash olib borayotgan jamoalar bilan bellashadi. “Spartak” “Ufa” maydoniga safar etsa, “Lokomotiv” o‘z uyida “Mordoviya”ni qabul qiladi.

Odil Ahmedov to‘p surayotgan “Krasnodar” ayni paytda 4-o‘rinni egallab turgan bo‘lsada, o‘zidan 3 ochko ko‘proq jamg‘argan “Zenit” bilan bronza medallari uchun kurashmoqda. So‘nggi turda “Zenit”ni “Dinamo”ga qarshi oson bo‘lmagan safar o‘yini kutib turibdi. Moskva klubi Premyer-ligadagi o‘rnini saqlab qolish yo‘lida to‘p suradi. “Krasnodar” esa o‘z maydonida “Amkar”ni qabul qiladi.

Ma’lumot uchun, Rossiya Premyer-ligasining so‘nggi tur bellashuvlari 21-may kuni bo‘lib o‘tadi.