Одил Аҳмедов ҳаракат қиладиган «Краснодар» Россия чемпионлигидан умидини узди

Ўзбекистонлик футболчи тўп сурадиган Россиянинг «Краснодар» клуби қаторасига учинчи мавсум Европа Лигасида иштирок этиш ҳуқуқини қўлга киритди.

• Одил Аҳмедов «Краснодар» билан шартномасини 2019 йилгача узайтирди

• Одил Аҳмедов: «Краснодар» Россия Кубоги ва чемпионлиги учун курашади

Россия Премьер-лигасида 2015/16 йилги мавсум якунига 2 та тур қолганида «Краснодар» мамлакат чемпионлиги учун имкониятларини сақлаб турганди. Бироқ 29-турга келиб жамоа чемпионлик учун асосий даъвогар бўлган Москванинг «ЦСКА» клубидан мағлуб бўлди ва назарий жиҳатдан чемпионлик учун имкониятларини йўқотди. Қайд этиш керак, жароҳати сабаб Одил Аҳмедов жамоадошларига ёрдам бера олмади.

• Ўзбекистон термаси сардори Одил Аҳмедов «Краснодар» сафида жароҳат олди

Мавсум якунига битта тур қолганида чемпион жамоа номи аниқ бўлиб улгурмасада, Чемпионлар Лигаси ва Европа Лигасида тўп сурадиган жамоалар номига ойдинлик киритилди. Унга кўра, келаси мавсум Европа Чемпионлар Лигасида Россия шарафини «ЦСКА» ва «Ростов» клублари ҳимоя қилади.

Сўнгги тур олдидан «ЦСКА» таъқибчисини 2 очко ортда қолдирмоқда. 30-турда Москва «армиячилар»и Қозонда Рубин меҳмони бўлса, «Ростов»ни Грознийда «Терек»ка қарши беллашув кутиб турибди.

Европа Лигасида «Зенит» ва «Краснодар» клубларининг қатнашиши аниқ бўлиб улгурди. Учинчи йўлланма катта эҳтимол билан Москванинг «Спартак» клубига насиб қилади.

• Одил Аҳмедов «Краснодар»дан кетиш нияти йўқлигини билдирди

«Спартак» таъқибчиси «Локомотив»дан 3 очко кўпроқ жамғарган. Сўнгги турда ҳар икки клуб Премьер-лигада жон сақлаб қолиш учун кураш олиб бораётган жамоалар билан беллашади. «Спартак» «Уфа» майдонига сафар эца, «Локомотив» ўз уйида «Мордовия»ни қабул қилади.

Одил Аҳмедов тўп сураётган «Краснодар» айни пайтда 4-ўринни эгаллаб турган бўлсада, ўзидан 3 очко кўпроқ жамғарган «Зенит» билан бронза медаллари учун курашмоқда. Сўнгги турда «Зенит»ни «Динамо»га қарши осон бўлмаган сафар ўйини кутиб турибди. Москва клуби Премьер-лигадаги ўрнини сақлаб қолиш йўлида тўп суради. «Краснодар» эса ўз майдонида «Амкар»ни қабул қилади.

Маълумот учун, Россия Премьер-лигасининг сўнгги тур беллашувлари 21 май куни бўлиб ўтади.