Erdo‘g‘on uni haqorat qilgan teleboshlovchini qo‘llab-quvvatlagani uchun Axel Springer konserni rahbarini sudga berdi

Turkiya prezidenti Rajab Toyyib Erdo‘g‘on Axel Springer media konserni rahbari Matias Depfnerga qarshi sudga ariza berdi, deya xabar qiladi “TASS” prezidentning advokati Ralf Xekkerga tayanib. Kompaniya rahbari teleboshlovchi Yan Bemermanni yoqlab chiqqan edi.

Depfner qiziqchiga yo‘llagan ochiq xatida uning she’ri “muvaffaqiyatli” chiqqanini aytgan. “Ovozim boricha kuldim”, — deya qayd etdi konsern boshqaruvi raisi, she’rda yangragan haqoratlarga qo‘shilishga tayyor ekanligini qo‘shimcha qilar ekan.

Kyoln sudi da’voni rad etishi mumkinligini bildirdi. Xekkerning ta’kidlashicha, bunday holda u Erdo‘g‘onga keyingi instansiyadagi sudga murojaat qilishni maslahat beradi.

Bemerman 31-mart kuni Neo Magazin Royale dasturi efirida Turkiya yetakchisiga qaratilgan haqoratli she’rni o‘qib berdi. Oqibatda Germaniya tashqi ishlar vazirligi Anqaradan boshlovchiga nisbatan huquqiy choralar ko‘rish so‘ralgan og‘zaki nota oldi.