20 yildan beri Islandiyani boshqarib kelayotgan prezident davlat rahbarligiga saylovlarda ishtirok etmasligini ma’lum qildi

20 yildan beri orol-davlat rahbari lavozimini egallab kelayotgan Islandiya prezidenti Olavur Ragnar Grimsson 25-iyunga belgilangan prezidentlik saylovlaridan nomzodini oldi. Bu haqda uning 9-may, dushanba kuni tarqatilgan rasmiy bayonotida ma’lum qilindi, deb xabar beradi “TASS”.

O‘tgan haftada tarixchi Gudni Yoxannesson va mamlakatning sobiq bosh vaziri, Morgunbladid gazetasi egasi David Oddsson saylovoldi poygasida ishtirok etishini e’lon qildi. Davlat rahbari aynan munosib nomzodlarning paydo bo‘lgani oltinchi bor saylovlarda qatnashishdan voz kechishiga sabab bo‘lganini bildirgan.

Shunisi ham borki, Grimsson jurnalistlar uning turmush o‘rtog‘i Dorrit Mussayeff ofshor kompaniyalari bilan bog‘liqligini aniqlaganidan so‘ng shunday bayonot berdi. Birinchi xonim va uning ota-onalari — Moussaieff Jewelers Limited zargarlik firmasi sohiblari ofshorlarda ulushlarga egalik qilgan. Buxoro yahudiylari sulolasi vakili bo‘lgan Mussayefflar (Musayevlar) oilasining mol-dunyosi yuzlab million dollarga baholanadi.

Eslatib o‘tamiz, oldinroq Islandiya bosh vaziri Sigmyundyur David Gyunnlyoygsson ofshor mojarosi tufayli iste’foga chiqqandi.