Ijtimoiy tarmoqlarda Toshkent shahri ko‘chalaridan birida boshiga fata taqib Captiva avtomobilini boshqarib ketayotgan qizning surati keng muhokama qilinmoqda, deb xabar beradi “Darakchi.uz”.
Mazkur surat Facebook’dagi “Voditeli Tashkenta” guruhiga joylanganidan so‘ng internet foydalanuvchilari uni qizg‘in muhokama qilishga kirishib ketdi.
“Qochoq kelin”, deb nomladi ishtirokchilardan biri mazkur suratni.
“Men ham to‘yim kuni go‘zallik salonidan o‘z shaxsiy avtomobilimda qaytganman. Svetoforning qizil chirog‘iga to‘xtaganimda, hamma menga qaragandi. O‘shanda meni salondan olib ketishga hech kimning vaqti yo‘q edi”,— deya o‘z fikri bilan bo‘lishgan yana bir foydalanuvchi.
Guruhning ayol haydovchi ishtirokchilari qizning mazkur xatti-harakatiga ijobiy baho berdi: “Ofarin!!! Ammo to‘ydan keyin o‘zingizni mushkul vazifalar, xususan erkak kishining vazifasi bilan qiynamang. To‘ydan keyin turmush o‘rtog‘ingiz olib yursin”.
“Buning hayratlanarli joyi yo‘q. Kelin salondan qaytayapti. Men hatto kelin ko‘ylakda mashina haydaganman. Yo‘l-yo‘lakay shu ko‘rinishimda kuyov uchun salla ham olib kelganman”, — deya izoh qoldirgan yana bir foydalanuvchi.
Muhokamaga kelinning tanishlari ham qo‘shilib, “Bu mening dugonam, bugun uning to‘yi. Men bu yerda hech qanday g‘ayrioddiy holatni ko‘rmayapman”,— deya o‘z e’tirozini yozib qoldirdi.
Izoh (0)