Andijon viloyatining Oltinko‘l tumanidagi “Baxt Imkon Rivoj Chorvasi” fermer xo‘jaligida O‘zbekistondagi birinchi echkichilik fermasi ish boshlash arafasida. Bu haqda “Gazeta.uz” xabar bermoqda.
Ferma uchun bino qurish ishlari oxiriga yetmoqda. Fermer xo‘jaligi rahbari Faxriddin Ismoilov ayni paytda Germaniyada bo‘lib, 1000 ta echki va shuncha mol sotib olish yuzasidan muzokaralar olib bormoqda.
O‘zbekistonda echki sutini iste’mol etishni xush ko‘radiganlar va bu jonivorlar boqiladigan xo‘jaliklar ko‘p, biroq shu paytgacha echki sutini sanoat ko‘lamida ishlab chiqaradigan yirik xo‘jaliklar yo‘q edi.
Bundan o‘n yil avval faoliyatini boshlagan “Baxt Imkon Rivoj Chorvasi” viloyatdagi peshqadam fermer xo‘jaliklaridan biri bo‘lib, hozirda 1000 dan ortiq yirik shoxli molga ega. Ulardan 600 tasi kuniga o‘rtacha 20—22 litr sut beradi. “Nestle O‘zbekiston” kompaniyasi tomonidan har kuni olinadigan sutning chorak qismi ushbu fermer xo‘jaligi hissasiga to‘g‘ri keladi.
Izoh (0)