2016-yil 28-aprel kuni Alisher Navoiy nomidagi O‘zbekiston Milliy kutubxonasi anjumanlar zalida O‘zbekistonda internet jurnalistika rivojining dolzarb masalalariga bag‘ishlangan Talabalarning yettinchi an’anaviy mediakonferensiyasi bo‘lib o‘tdi.
Tadbir tashkilotchisi – Mirzo Ulug‘bek nomidagi O‘zbekiston Milliy universiteti jurnalistika fakulteti “Uslubiyat, tahrir va Internet jurnalistika” kafedrasi.
Hamkorlar – Alisher Navoiy nomidagi O‘zbekiston Milliy kutubxonasi, DEKOS kompaniyasi.
Talabalarning An’anaviy mediakonferensiyasi – talaba yoshlarning axborot-kommunikatsiya texnologiyalari hamda internet jurnalistika sohalari tajribali mutaxassislari bilan o‘zaro fikr almashishi, zamonaviy jurnalistika va media tizimining muammolari yuzasidan o‘z nuqtai nazarini bildirishi uchun qulay imkoniyat. Shuningdek, mazkur tadbir yosh tadqiqotchilarning kelgusida milliy Internet jurnalistika amaliyoti va nazariy asoslarini yanada rivojlantirish yo‘lida qo‘ygan dastlabki qadami hamdir.
Milliy axborot kengligining global tarmoq bo‘lagiga aylanganiga 20 yil bo‘ldi. Biroq mana shu qisqa muddat ichida Internet auditoriyasi geometrik progressiya bo‘yicha kengayib bordi. Bugungi kunda O‘zbekistonda 10 milliondan ortiq internet foydalanuvchisi mavjud. Bu mamlakat aholisining 1/3 qismi demakdir.
Ijtimoiy media resurslari foydalanuvchilarining bu qadar shiddat bilan o‘sishi ularning bugungi kunda PR va marketing sohasining muhim instrumentlari sifatida tan olinishiga olib keldi. Sotsial media – millionlab, hatto milliardlab insonlarni birlashtirishga qodir virtual maydon. Uning mana shu integrativ imkoniyatidan unumli foydalanish, ijtimoiy media taraqqiyoti samarasi o‘laroq vujudga kelgan yangi texnologiyalarni o‘rganish va ularni amaliyotga tatbiq etish davr talabi. Ana shunday yangi hodisalardan biri – kraudsorsing va kraudfanding texnologiyalaridir.
Bu yilgi, VII mediakonferensiya ishtirokchilari ushbu texnologiyalar mazmun-mohiyati, ularni OAV faoliyatiga joriy qilish masalalari xususida o‘z mulohaza va takliflarini bildirdi.
Odatdagidek, konferensiya spikerlari ham, moderatorlari ham – talaba yoshlar. Bu gal ular tajribali jurnalistlar Medikonferensiyaning barcha ishtirokchilari har bir ma’ruza yuzasidan faol bahsga kirishish imkoniga ega bo‘ldi.
Tadbir ishtirokchilari va mehmonlari homiylarning esdalik sovg‘alari va quyidagi nominatsiyalar bo‘yicha sertifikatlar bilan taqdirlandi:
- Eng yaxshi g‘oya
- Eng yaxshi spiker
- Eng yaxshi taqdimot
- Eng yaxshi moderator
- Eng yaxshi savol
- Eng yaxshi hamkor
- Eng yaxshi tashkilotchi
- Eng yaxshi axborot hamkori
- Yil professionali
- Tomoshabin tanlovi