Madridning “Atletiko” futbol klubi bosh murabbiyi Diyego Simeone “Bavariya”ga qarshi Yevropa Chempionlar Ligasi yarim final dastlabki uchrashuvi oldidan o‘z fikrlari bilan o‘rtoqlashdi, deya xabar bermoqda UEFA rasmiy sayti.
“Biz faqat bir narsa — g‘alaba haqida o‘ylashimiz kerak. Hujumda katta salohiyatga ega bo‘lgan jamoa va o‘yindan o‘yinga o‘zgara oladigan murabbiyga qarshi og‘ir o‘yin kutyapman. Imkon bo‘lishi bilan, tashabbusni qo‘lga olishga harakat qilamiz. Shu jihatdan, bizni butun musobaqa mobaynidagi eng muhim uchrashuv kutib turibdi”, — dedi Simeone.
“Bizda turfa o‘yinchilar bor. Jangda askari ko‘p emas, balki askarlardan samaraliroq foydalana olgan tomon g‘alaba qozonadi. Men uchun futbolda yoki hayotda qasos degan tushuncha yo‘q — men faqat yangi imkoniyatlarni ko‘raman”, — dedi madridliklar ustozi.
“Biz ham, ‘Bavariya’ ham o‘xshash holatda. Chempionatda g‘olib chiqish uchun uchrashuvlarda g‘alaba qozonish kerak, shunday ekan, har ikkala klub ham bir xil vaziyatda. Men bor-yo‘g‘i jamoam g‘alabasini istayman, boshqa narsani emas”, — deya qo‘shimcha qildi “Atletiko Madrid” bosh murabbiyi Diyego Simeone.
Ma’lumot uchun, “Atletiko Madrid” — “Bavariya” uchrashuvi 27-aprel, chorshanba kuni Toshkent vaqti bilan 23:45 da boshlanadi. “Daryo” internet-nashri mazkur uchrashuvdan matnli onlayn uyushtiradi.
Izoh (0)