Braziliyada impichment jarayoni mamlakatning legitim rahbarlarini ag‘darishga qaratilgan qurolga aylanib qoldi. Bu haqda prezident Dilma Russeff xorijiy jurnalistlar oldidagi chiqishi chog‘ida ma’lum qildi, deya xabar beradi “TASS”.
“Braziliyada vaqti-vaqti bilan bosh ko‘taradigan davlat to‘ntarishi tarafdorlari bor. Agar mamlakat tarixiga nazar solib, Jetuliu Vargasdan boshlab uning rahbarlari faoliyatini yodga olsak, impichment muntazam ravishda saylangan prezidentlarga qarshi qurol sifatida foydalanib kelinganiga guvoh bo‘lish mumkin”, — deya ta’kidlagan prezident.
Russeff, shuningdek, Braziliyadagi ilk ayol davlat rahbari bo‘lganligi uchun kamsitilayotganini bildirgan. “Menga nisbatan amalga oshirilayotgan ayrim harakatlar erkak prezidentga qo‘llanmagan bo‘lardi. Bo‘layotgan voqealarga ayollarga nisbatan eski qarashlar ham qorishib ketgan”, — deb hisoblamoqda u.
Eslatib o‘tamiz, oldinroq mamlakat parlamenti quyi palatasi deputatlari Dilma Russeffni Braziliya prezidenti lavozimidan chetlatishni yoqlab ovoz bergandi. Yakuniy qaror yuqori palata senatorlari tomonidan qabul qilinadi.
Izoh (0)